Time Is Money

Galau sabana galau nan di rasoan Buyuang. Lah sapuluah kali inyo manembak Mira, kawan samo sakolanyo. Tapi sabanyak tu pulo Mira manulaknyo masak-masak. Lah bamacam caro diusahoan Buyuang supayo cintonyo ditarimo, tapi hasianyo nihil, kosong malompong. Nan si Mira tetap jo pendiriannyo, ndak ado cinto untuak Buyuang.

Tapi bukan Buyuang namonyo kalau ndak kareh hati. Prinsip iduik Buyuang, “Maju taruih pantang malu”. Sanjo hari barangkek lah Buyuang ka rumah si Mira, nan tingga di kampuang sabalah. Diracaknyo onda asbul kesayangannyo. Niat Buyuang nio pendekatan ka urang tuo Mira. Ibarat pepatah, “Kalau nio buahnyo, panjek dulu batangnyo”

Pucuak dicinto apak Mira pun ado. Tibo di rumah Mira, basobok Buyuang jo apak Mira, nan sadang tagak di teras rumah, siap-siap ka musajik untuak sumbayang mugarik.

“Assalamualaikum, ado Mira pak?”

“Waalaikumsalam, Mira sadang mandi. Sia waang yo? Baru sakali ko den mancaliak ang?”

“Awak Buyuang Pak, kawan Mira, hehe.”

“Oh, duduak lah. Dima tingga?”

Buyuang pun duduak di kursi teras rumah, baitu pulo Apak Mira duduak di dakek inyo.

“Wak tingga di Kampuang CML Pak, kampuang subalah”

“Jam bara tadi barangkek?”

“Jam 6 Pak”

Apak Mira mancaliak arloji di tangan kidanyo.

“Hmm capek juo tibo di siko yo? Kini baru jam 6 lewat saparampek”

Time is money Pak, wakatu adolah pitih. Wak ndak suko balambek-lambek doh. Kalau bisa capek manga harus lambek”. Mulai cari muko si Buyuang karambia ko, wkwkwk.

“Mantap tu, ambo suko jo caro bapikia Nak Buyuang. Alah makan? Kebetulan amak si Mira sadang mamasak pangek cubadak”. Mulai malunak Apak Mira, ndak ba waang-waang lai.

Mandanga pangek cubadak ampia sajo baserak aia salero Buyuang, tapi ditahannyo karano gengsi.

“Alah Pak, wak ndak suko balambek-lambek doh, tadi pulang sakola langsuang wak makan”

“Santiang, yo cando itu Yuang. Kecek Mira akhia-akhia ko kalian banyak PR, lah bakarajoan?”

“Tapi wak ndak suko balambek-lambek, pulang sakola langsuang wak karajoan, Pak”

“Hebat! Oh iyo, sumbayang mugarik lah kito ka musajik dulu Yuang, sabanta lai abih wakatunyo”

“Baa pulo Apak ko? Kan lah wak kecek an tadi, kalau wak ndak suko balambek-lambek doh. Tadi pulang sakola langsuang wak karajoan. Kalau Apak alun, sumbayang lah Apak lai”

Mandanga jawaban Buyuang, tangangak Apak Mira ko.

“Den ndak pulo suko balambek-lambek doh, Yuang… Capek pai ang dari siko…!!”

“#%&@!!??” Buyuang malangkah lameh, sambia gawik-gawik kapalo. (HZ)

Facebook Comments

About the author

mm
HARIO ZONES

HARIO ZONES, Lahir 11 November 1984 di Payakumbuh dari rahim seorang Ibu yang sangat menginginkan anak perempuan karena tiga anak sebelumnya adalah laki-laki. Alumni SMA 2 Payakumbuh 2002 yang sangat gagah rupawan. Selepas SMA kemudian melanjutkan kehidupannya di Bandung sebagai pedagang pakaian. Hobinya menulis apa saja mulai dari yang tidak penting sampai ke yang tidak penting banget. Beliau juga hobi membaca sejak SD berawal dari membaca koran bekas gorengan.

mm By HARIO ZONES