Padang Bengkok

“Orang mana?”

“Orang Padang, Sanak.”

“Ohhh. Padang Bengkok.”

“Apo kecek Ang. Den patahan batang lie Ang itu. mangecek Ang sakali lai, jo gigi-gigi Ang den tangga an. Kalau paralu jo sarawa-sarawa Ang den tangga an. Bia bantuak baruak indak basarawa Ang lai. Bajuntai-juntai dek lari bantuak manciak dikaja kucing gilo.”

***

Urang awak tu salah satu pangananyo pai ka rantau. Anta itu rantau dakek. Anta itu rantau jauih. Nan pentiang pai ka kampuang urang. Inyo indak peduli makan atau indak makan di rantau. Itu urusan bisuak-bisuak sajolah. Tujuannyo ciak se nan pentiang den ka kampuang urang. Dalam pangananyo di kampuang ndak jo nan ka dikarajoan. Ado juo nan malu di kampuang, umuah batambah, babini alun, rantau lah nan dipiliah.

Kalau pai ka rantau tu, kalau lah tabik di pangana indak tantu siang indak tantu malam. Nan pentiang barangkek. Manumpang jo truk, bakarajo dari rumah makan ka rumah makan supayo bisa hiduik sapanjang pajalanan. Nan dibao kain salai tu nyo, baju di badan, sarawa nan alah indak batuka tiga hari, tambah ciak lai, rokok sabungkuih.

Kalaulah di rantau karajo nyo pura-pura manjadi karyawan urang dolu, dakik dapek pangalaman. Dapek pangalaman nyo bukak surang lai. Makonyo urang Minang tu pai marantau manjadi rang panggaleh. Paliang kareh manjadi karyawan urang satahun, paliang lamo duo tahun, sudah nyo bukak surang lai mode di Blok M, Tanah Abang.

Tapi indak sampai di sinan sajo do. Urang-urang rantau ko lah nan acok dapek sasaran Padang Bengkok. Yo sakik hati mandanganyo.

***

Apo bana Padang Bengkok tu? Kalau sanak bisa manjaweknyo jawek sajo di kolom kementar. Atau sanak kirim tulisan ka mejoh redaksi Janang, bia kito tabik an tulisan sanak.

Padang Bengkok ko kalau di Jawa tu alah mode pameo dek urang. Iyo sakik hati kalau dikecek an Padang bengkok. Sabek Padang Bengkok ko samo jo pangkianek, pancaliah, licik, indak bisa dipayo, suka mamakan punyo urang. Ba a indak ka raman kito mandanganyo. Raso-raso ka dimakan incek mato urang nan mengecek tu.

Bengkok tu samo jo kayu, bakaluak kecek urang awak. Kalau nan bakaluak yo indak bisa dipagang do baek kato, karajo, pangana. Kalau tibo di mantimun indak masuak hituangan. Kan yo kurang aja tu urang nan mangecek an Padang Bengkok.

Lapeh dari pangana urang-urang lua tantang Padang Bengkok, sabananyo itu hanyolah buah pangana nan indak ado tulang pungguang. Rang minang tu rajo untuak dirinyo surang-surang, indak barajo ka urang lain. Bahaso sederhana tu pantang baginyo manunduakkan kapalo labiah randah dari kapalo urang. Yo batuah-batuah rang bebas. Kasta ko ndak dek rang minang do. Ko rang kayo, ko rang bansek, ko rang keturunan rajo-rajo, samo se deknyo. Indak pulo ka menyambah-nyambahnyo kapado orang. Level inyo dalam kapalonyo samo sajo ko urang-urang diateh dunie ko. Indak ado manusia ko nan paralu diTuhankan.

Pikiran iko ado dalam diri urang Minang. Kamano inyo pai nyo bao panganako. Makonyo bebas inyo pai kamano sajo ka malakuan apo sajo. Kalau indak bacaro mamarintah urang Minang ndak ka bisa. Itu nan indak dimangarati urang-urang lua ko. Kenali adek, mako tahu jo Rang Minang. Dan sabek itu pulo urang Minang selalu spesial.

ALIZAR TANJUNG, 02/11/2019

Facebook Comments

About the author

mm
ALIZAR TANJUNG

Lelaki yang selalu merasa beken dengan jenggotnya ini, paling suka tersenyum kalau giginya tidak terlihat. Tergila-gila dengan Tuhan. Dia merasa selalu paling remaja di antara umat manusia.

Alizar Tanjung menupakan penulis di beberapa media di Indonesia. Selain itu dia adalah pakar motivasi dan konsultasi. Dia memperoleh Certified NPL for Personality Plus. Certified Hypnosist and Hypnotherapist IBH (Ch., Cht.) dari IBH.

mm By ALIZAR TANJUNG