LAGAK RAYO

PINTEREST.COM

 

Sempurnakanlah oleh mu bilangan Ramadhan dan bertakbir kepada Allah sesuai petunjuk-Nya, agar kamu dapat bersyukur (QS Albaqarah:185).

Laisal id libasul jadid, wa aklul lazid, walakinul id taqwa yazid ( Idul fitri itu bukan karena baju baru dan makanan enak, tetapi saat taqwa bertambah). 

Norma ayat di ateh dan kato bijak ko patuik diparahatikan dalam manyambuik datangnyo hari rayo. Habih bulan puaso tantu tibo hari rayo. Hari rayo iyo sabana di nanti-nanti oleh saluruah umat  Islam nan sadang puaso Ramadhan baitu juo, urang nan indak pun puaso labiah sumangaik pulo marayokan idul fitriko.

Mariahnya hari rayo di nagari awakko sajak mulai masukunyo Islam sekitar labiah tujuah abad nan lalu. Kueknyo Islam mambao pulo kamariahan hari rayo. Untuk marayokan kamanangan parang jo diri sandiri (surang-redaksi), yaitu mangalahkan nafsu makan, minum dan syahwat biologis sejak tabik fajar sampai tabanam matohari salamo sabulan.

Hari rayo dimariahkan sagalo baru. Pakaian baru, rumah dibarui, oto kalau dapek baru pulo. Makanan sagalo nan lamak-lamak dibuek untuk manjamu dunsanak na ka datang di hari rayo. Parabot rumah tangga bagi nan bakepeng juo dibali nan baru. Pokok’e sagalo nan dipunyoi diupayoan nan baru.

Di hari rayo batambah bagalinsam-pinsam adolah urang nan pulang ka kampuang masiang-masiang, kini disabuik jo “mudiak lebaran” namonyo. Iyo sabana sibuk sagalo pihak dek urang nan pulang kampung pai bahari rayoko. Polisi lalu lintas maatur lalu lintas siang malam bagiliran. Banyak kononnyo nan indak bisa pulang barirayo jo anak bininyo, tugeh kato pak polisi tu.

Kementrian perhubungan mangawasi sagalo angkutan, oto, kareta api, pasawat udara, kapa lauik, panyabarangan nan baitu padek, rami bana manuruik laporan nan di tayangan di tivi tiok hari jo acaranyo mudiak lebaran.

Kecek Menko Perekonomian Darmin Nasution balanjo hari rayo masyarakat menjadi stimulus bageraknyo ekonomi. Inflasi jadi randah di bulan Mei jo Juni ko kareno balanjo konsumtif meyambut datangnyo rayo idulfitri

Hari rayo tabukti efektif mamindahkan urang dari kota ka desa dalam jumlah banyak karano itu panggilan agamo jo raso bakampuang. Raso iman untuk basilaturahim jo ibu-bapak, nenek dan kaluarga nan di kampuang. Raso dan harago diri sebagai bahagian dari satu kaluarga besar nan tiok hari dipisah an dek usaho masing-masing, di hari rayo batamu dengan gembira dan sanang hati.

Iyo sabana kalua sagalo lagak di hari rayoko. Nan bapitih banyak yo mancaliak’an sagalo macam kamewahan hiduik. Nan miskin iyo mauruik dado sajo, walaupun anak harus dibalian baju rayo dan bini pulo minta dibalian dagiang rayo. Maka sagalo usaho dan caro dipakai untuk manghadapi lagak rayo nan katibo.

PITIH BALANJO RAYO 

Sulik manyabuik kini klo ado urang manyabuik ambo indak paralu pitih di hari rayo doh. Pitih, uang ataupun kepeng sabana paralu di musim rayo ko. Pitih manjadi sabab gadang galaknyo di lapau urang rantau. Pitih klo ndak ado iyo karuh muko parantau nan jo ingin pulang kampuang.

Balanjo untuk manyongsong rayo jo balanjo di hari rayo paralu pitih nan indak saketek jumlahnyo. Tabungan nan lamo, THR dari tampek karajo, gaji jo panghasilan nan batarimo, rato-rato indak cukuik untuk kabutuhan rayo. Iyo sabana bedo, pusing kapalo nan anaknyo banyak pulo, karano sado nyo minta baju rayo jo sagalo kaparaluan untuk malagaki kawan-kawan nyo.

Budaya hidup hedon dan material kini manjadi panyabab utamo hari rayo kahilangan makna dan artinyo. Sabana nyo mukasuik hari rayo adalah mamariahkan pahalo taqwa nan mamperbaiki diri manjadi manusia sejati nan fitri. Manusia suci hati, luruih pikiran dan elok pulo budi pekerti sarato baik hubungan jo Allah dan makhluknyo.

Kasimpulannyo harusnyo hari rayo bukan untuk malagak, bukan pulo untuk pamer kekayaan, indak pulo untuk mancari namo tetapi adolah untuk mambuktikan hati nan lah barasiah, jiwa nan lah elok, pikiran nan luruih, ibadah nan lai taat. Semoga minal aidin wal faizin, kembali kesucian dan kemenangan menjadi bahagian kito sadonyo. Amin(*)

Facebook Comments

About the author

mm
Prof. Dr. Duski Samad, M.Ag

Prof. Dr. Duski Samad, M.Ag, Ketua MUI Kota Padang, merupakan dosen dan guru besar di UIN Imam Bonjol. Tulisannya tersebar di beberapa media cetak dan aktif mengelola Duski Samad Institute. Salah satu bukunya yang sudah terbit, Konseling Sufistik (Grafindo Press Jakarta; 2017)