BUYA BASUREK

Foto: Istimewa

Judul Buya basurek iko kalua, karano takana carito maso lalu di jaman Ulando, bahubungan jo panghulu ado sabutan panghulu basurek. Panghulu basurek adalah ninik mamak nan pengesahanyo sebagai panghulu kaum di agiah surek dek pamarentahan Ulando. Padahal sah atau tidaknyo seorang ninik mamak manjadi panghulu di kaumnyo bukan dek karano surek Ulando tu, akan tetapi ditantuan dek kasapakatan kamanakan nan dalam kaumnyo. Kajadian nan tajadi labiah sa abaik nan lalu  itu basuo lo baliak, tapi indak jo panghulu doh,  hanyo jo buya, yaitu ulamo dan pancaramah nan karajonyo maagih caramah atau panarangan agamo.

Indak ado angin, indak ado awan bagai tando ka hujan doh, lalu turun sajo “hujan” barupo surek rekomendasi yang dikaluaan dek Kamantrian Agamo RI bahwa ado 200 urang mubaligh nan lai punyo kamampuan (kompetensi), memiliki namo gadang dan pangalaman laweh (reputasi) sarato nan indak diraguan sakatek alah juo  kesukaan dan pengabdiannyo (integritas) kapado NKRI. Sabana heboh dan menimbulkan salah sangko umat banyak ka Mantari Agamo nan urang sumando Minang ko, apo lo mukasuik negara maagiah surek pulo Buya mubaligh. Pandapek nan bamacam-macam tantu alah biaso, namonyo saja maso demokrasi, kebebasan mangecek, dan ditambah pulo media sosial sangaik kuek mampagunjiangan Mantari Agamo nan basungguah-sungguah manjalehan indak ado mukasuik politik bagai doh, hanyo untuk manjawek tanyo masyarakat nan ka maundang pancaramah.

Saminggu lamonyo carito manjadi-jadi disabuik oleh sagalo urang nan ba jinih, anggota DPR nan wakil rakyat mengkritik Mantari Agamo — jaan Buya, ulama dan mubaligh  dikotak-kotakan, dihalangi inyo bacaramah di masjid, surau dan tampek pangajian mano sajo– , kareno inyo adolah manyampaikan nan bana dan manolong nagara sajak samulo sampai saat kini. Kini masalah tu alah dingin artinya alah dapek kata sasuai, bahwa Mantari Agamo manyarahkan masalah namo nan 200 tu baa nan ka rancak ditambah atau ka dipangakan dipersilakan Majelis Ulama Indonesia (MUI) nan maurusnyo. Namun, carito iko sulik habihnyo, malam Sabtu, 26 Mei 2018 di chanel TV Swasta Nasional ado dialog nan bajudul Ulama di Kontrol?.

Narasumbernya Sekjen MUI Pusat, juru bicaro pamarintah dan surang lai mubaligh yang dikenal masyarakat banyak. Anwar Abbas Sekjen MUI, sambia senyum ketek dan tanang mengatoan ulama dan mubaligh indak ado di kontrol doh. Nan ado tu saling mangarati dan komunikasi antaro ulama, mubaligh dengan pamarentah, ado nan tahalang atau indak lancar. Kecek wakil mubaligh di TV itu bahwa sabananyo pamarentah salah sambung, sabagai contoh pamarentah ba masalah jo aktivis 212, lalu pejabat pamarentah basuo jo Muhammadiyah, NU dan ormas nan lah jaleh salamoko mandukung pamarentah juo.  Nan ka tibo samo-samo disepakati untuk dilaksanankan rekonsiliasi nasional, pitih MUI indak ado doh, kalau pamarentah maubek silakan, kami akan mendukung tegas sekjen MUI pusat.

TUGEH POKOK BUYA

Ba suluah matohari, ba galangang mato urang banyak, bahwa nan manjadi fungsi, kegunoaan dan tugeh ulama dan mubaligh sangek banyak, hampia saluruh sisi kahidupan. Kini sabahagian gadang kajaronyo  alah di ambiak alih dek pemerintah dan akibat kemajuan dunia moderen nan sagalo digital sajo. Tugeh dan fungsi utamo ulama dan mubaligh dalam mendidik masyarakat baa agamo jo hiduik nan labiah baik alah dibueknyo di masjid, mushala, surau, langgar, dan tampek pengajian di seluruh kalompok masyarakat. Hanyo sajo dalam manyampaian ajaran agamo iyo acok pajabat nagara nan tasinggung, khususnya nan korupsi atau pelaku kejahatan lainnyo. Karano, memang kawajiban ulama jo mubaligh adolah manyampaikan nan bana sasuai parintah Allah dalam al-Qur’an surek Ali Imran ayat 104-105:

وَلۡتَكُن مِّنكُمۡ أُمَّةٞ يَدۡعُونَ إِلَى ٱلۡخَيۡرِ وَيَأۡمُرُونَ بِٱلۡمَعۡرُوفِ وَيَنۡهَوۡنَ عَنِ ٱلۡمُنكَرِۚ وَأُوْلَٰٓئِكَ هُمُ ٱلۡمُفۡلِحُونَ ١٠٤ وَلَا تَكُونُواْ كَٱلَّذِينَ تَفَرَّقُواْ وَٱخۡتَلَفُواْ مِنۢ بَعۡدِ مَا جَآءَهُمُ ٱلۡبَيِّنَٰتُۚ وَأُوْلَٰٓئِكَ لَهُمۡ عَذَابٌ عَظِيمٞ ١٠٥

Artinyo:  Dan hendaklah ada di antara kamu segolongan umat yang menyeru kepada kebajikan, menyuruh kepada yang ma’ruf dan mencegah dari yang munkar[Ma’ruf: segala perbuatan yang mendekatkan kita kepada Allah; sedangkan Munkar ialah segala perbuatan yang menjauhkan kita dari pada-Nya.); merekalah orang-orang yang beruntung. Dan janganlah kamu menyerupai orang-orang yang bercerai-berai dan berselisih sesudah datang keterangan yang jelas kepada mereka. mereka Itulah orang-orang yang mendapat siksa yang berat.

Penyampaian Buya,  ulama jo mubaligh dalam caramahnyo iyo harus jaleh, indak buliah ba usahoan ba lunak-lunakan atau di aliahkan pangaratiannyo. Dalam adaik Minangkabau disabuik papatahnyo, adaik ba sisampiang, syarak ba tilanjang (adaik dapek digunokan kato kieh, sadangkan agamo harus ba jaleh-jaleh, tarang banderang). Ulama dan mubaligh dalam managakkan nan bana, malarang umat mambuek nan mungkar, adalah tugeh dan fungsinyo nan utamo sakali. Caramah ulama jo mubaligh indak buliah baguman saja, tetapi nyato an bana itu bana dan nan salah itu salah, walau nyawo taruhahannyo.

يَٰٓأَيُّهَا ٱلۡمُدَّثِّرُ ١  قُمۡ فَأَنذِرۡ ٢  وَرَبَّكَ فَكَبِّرۡ ٣  وَثِيَابَكَ فَطَهِّرۡ ٤  وَٱلرُّجۡزَ فَٱهۡجُرۡ ٥

Artinyo: Hai orang yang berkemul (berselimut), Bangunlah, lalu berilah peringatan! Dan Tuhanmu agungkanlah! Dan pakaianmu bersihkanlah, Dan perbuatan dosa tinggalkanlah, (QS. al-Mudattsir, 1-5).

Dalam surek Yasiin ayat 17 ditegaskan pulo bahwa manyampaikan caramah agamo harus jaleh dan terang karena itu ajaran Allah yang dibao Rasul.

وَمَا عَلَيۡنَآ إِلَّا ٱلۡبَلَٰغُ ٱلۡمُبِينُ ١٧

Artinya: Dan kewajiban Kami tidak lain hanyalah menyampaikan perintah Allah dengan jelas”.

Buya, ulama dan mubaligh dalam manyampaikan pangajian atau caramah agamo tahu bateh, hingo, caro dan kiat nan tapek. Indak mungkin surang mubaligh ka sumbarang mangecek saja, karano inyo mambawo mandat ilahi. Mubaligh alah diagiah pedoman oleh Allah subhanuwata’ala dalam surek al-Nahl ayat 125.

ٱدۡعُ إِلَىٰ سَبِيلِ رَبِّكَ بِٱلۡحِكۡمَةِ وَٱلۡمَوۡعِظَةِ ٱلۡحَسَنَةِۖ وَجَٰدِلۡهُم بِٱلَّتِي هِيَ أَحۡسَنُۚ إِنَّ رَبَّكَ هُوَ أَعۡلَمُ بِمَن ضَلَّ عَن سَبِيلِهِۦ وَهُوَ أَعۡلَمُ بِٱلۡمُهۡتَدِينَ ١٢٥

Artinyo: Serulah (manusia) kepada jalan Tuhan-mu dengan hikmah[Hikmah: ialah Perkataan yang tegas dan benar yang dapat membedakan antara yang hak dengan yang bathil] dan pelajaran yang baik dan bantahlah mereka dengan cara yang baik. Sesungguhnya Tuhanmu Dialah yang lebih mengetahui tentang siapa yang tersesat dari jalan-Nya dan Dialah yang lebih mengetahui orang-orang yang mendapat petunjuk.

Ayat di ateh dengan jaleh alah manantu an tugas dan guno ulama jo mubaligh. Jikok ado pihak nan maraso tasinggung dek ulama dan mubaligh dalam pangajiannyo indaklah patuik mereka di musuhi atau dihalang-halangi dalam manjalankan amanah Allah nan mulia ko. Pajabat pamarentah nan kahwatir bahwa ulama jo mubaligh dapek manganggu kaamanan, dan ketertiban masyarakat adalah ba kalabihan bana raso nyo tu mah. Masyarakaik alah cukuik mangarati dan paham apo tindakan nan ka dilakukan dan baa pulo sikapnyo manghadapi soal nagara kito ko. Siapopun harus mangarati pula, bahwa zaman now ko sagalo berita, kajadian, pandangan dan pandapek siapo saja mudah dikatahui publik karena media alah sangaik canggih, labih-labih lai medsos yang tidak batas dan indak ba sensor bagai.

Kasimpulan nan patuik dinyatoan bahwa ulama, mubaligh atau buya nan basurek adalah indak pado tampek nyo. Umat tahu siapo sajo buya nan lai barisi, ba pangalaman dan lai cinto ka nagarako, jaleh itu nan ka inyo undang. Pamangku kapantingan rakyat, pajabat nan ba pangkek sarancaknyo patuhilah ajaran agamo nan disampaian ulama, mubaligh atau buya kito itu. sak sanko, saling curiga indak elok, badosa awak samo-samo batujuan mampabaiki nagari ko. Niat baik pemerintah dan buya (ulama dan mubaligh) tidak diragu an lain, hanyo sajo caro mangacekan atau menyampaikan kurang tapek, atau ado di antaro duo balah pihak nan maraso paling bana sajo, urang lain salah.

Bagitu juo lembaga ulama dan mubaligh – MUI dan ormas Islam –  diminta untuk lebih aktif maningkek an kamamapuan anggotanyo. Pamarentah tantu handaknyo dapek labih mambari parhatian ka ulama, mubaligh dan aktivis Islam, karano negarako adalah milik kita sado alahe. Kenyataan umat Islam mayoritas dapek diharagoi dalam sistim hiduik ba nagara dan iklim keagamaan yang kondusif adalah kebutuhan sagala pihak, semoga nan alah jadi bahan pelajaran. Amin.

DS. 27052018. 11 Ramadhan 1439H.

 

Facebook Comments

About the author

mm
Prof. Dr. Duski Samad, M.Ag

Prof. Dr. Duski Samad, M.Ag, Ketua MUI Kota Padang, merupakan dosen dan guru besar di UIN Imam Bonjol. Tulisannya tersebar di beberapa media cetak dan aktif mengelola Duski Samad Institute. Salah satu bukunya yang sudah terbit, Konseling Sufistik (Grafindo Press Jakarta; 2017)